Macallin Diego Simeone oo maqlay aflagaadadii uu Sergio Ramos u geystay calanwadaha kulankii xalay ee Madrid Debry & Kabtanka Los Blancos oo la ganaaxi karo

(Madrid) 29 Sebt 2019. Kulankii xalay Madrid Derby ee ka dhacay garoonka Wanda Metropolitano kaasoo ku dhammaaday barbaro goolal la’aan ah kama aysan dhicin waxyaabo badan oo muran dhaliyey, marka laga reebo hal arrin oo ka dhacday meel ku dhow kursiga keydka gaar ahaan halka uu joogay macallinka Atletico Madrid ee Diego Simeone kaasoo ku baaqay in la ciqaabo kabtanka kooxda Real Madrid ee Sergio Ramos.

Kabtanka kooxda Los Blancos ee Sergio Ramos kaasoo aan ku qancin go’aan uu qaatay calanwadaha ciyaarta ayaa inta dhankiisa soo saaday aflagaado u geystay hooyadiis, macacallinka Atletico Madrid ee Diego Simeone oo isna dhinac taagnaa ayaa ku qeyliyey calanwadaha, maadaama uusan wax tallaabo ah ka qaadin ciyaaryahanka Ramos oo aflagaadeeyey hooyadiis.

Hoggaamiyaha reer Argentina ee Diego Simeone ayaa isagoo la hadlayey calanwadaha kulankaas ee uu Ramos aflagaadeeyey hooyadiis waxa uu yiri: “Sidee ayaad ku ogolaan kartaa middaas? ‘wuxuu yiri dh*lo ayaa ku dhashay”.

Kanaalka Movistar ayaa kaamiraddiisu waxa ay qabatay dhacdadaan, waxaana ka muuqanayey Ramos oo hadal ku oronaya calanwadaha, xilli macallin Simeone uu si xun uga carooday hadalkaas, waxaana uu dalbaday in kabtanka kooxda Real Madrid loo taago kaar, waxaana uu xusuusiyey calan-hayaha aflagaadeyntii uu kala kulmay kabtanka Los Blancos.

Prof. Ortega oo ah caawiyaha tababare kooxda Atletico Madrid ayaa kaddib soo gaaray goobka uu falku ka dhacay waxaana uu garsooraha afaraad ee ciyaarta uu xusuusiyey in hadda ka hor Diego Costa casaan lagu siiyay aflagaado sidaan oo kala ah kulan ay la ciyaarayeen Barcelona, kaddibna siddeed kulan lagu ganaaxay.

Si kastaba ha ahaatee, lama garanayo wax ay xiriirka kubadda cagta dalka Spain ku ganaaxi doonaan ciyaaryahankan haddii uu warbixinta garsooraha ee ciyaarta uu ku soo daro aflagaadada uu calanwaduhu kala kulmay kabtanka Ramos.