(Turin) 28 Sebt 2019. Kooxda Juventus ee uu qeyb ka yahay Cristiano Ronaldo ayaa waxay maanta kulan sahlan kula ciyaari doonaan naadiga yar ee SPAL, kulankan ayaa ka tirsan kulamada 6-aad ee horyaalka Serie A xilli ciyaareedkan, wuxuuna ka dhici doonaa Allianz Stadium.
Cristiano Ronaldo ayaa xilli ciyaareedkan ka dhaliyay ilaa iyo haatan horyaalka Serie A 2 gool oo kaliya, taasoo ka dhigan inuu gaaray goolkiisa 23-aad ee horyaalka tan iyo markii uu yimid kooxda Juventus sanadkii 2018.
Weeraryahanka reer Portugal ayaa wuxuu si xoogan u doonayaa kulanka ay maanta la ciyaari doonaan kooxda SPAL inuu goolal ka dhaliyo, si uu u wanaajiyo rikooradiisa.
Haddaba Ronaldo ayaa heysta fursad uu ku sameyn karo rikoor taariikhi ah haddii uu kulanka maanta awood u yeesho inuu dhaliyo 4 gool, isla markaana uu ka faa’iideysto awood yarida kooxda SPAL oo heysata ilaa iyo haatan kaliya 3 dhibcood, iyagoo fadhiya boosaska ugu dambeeya ee dhanka kala sareynta horyaalka Talyaaniga.
Ronaldo ayaa ujeedkiisu yahay inuu gaaro maanta rikoor cajiib ah, si uu u noqdo xiddigii ugu horreeyay addunka ee gaara goolkiisa 700-aad inta uu ku gudajiray xirfadiisa ciyaareed ee kubadda cagta haddii ay ahaan laheyd heer kooxeed iyo xulkiisa qaranka Portugal, waana ciyaaryahankii lixaad ee taariikhda kubadda cagta soo maray ee sameeya rikoorkan.
Ronaldo ayaa dhaliyay 603 gool xirfadiisa ciyaareed ee heer kooxeed, iyo 93 gool ee ah xulkiisa qaranka Portugal, haddii uu kulanka maanta awood u yeesho inuu dhaliyo 4 gool, wuxuu gaari doonaa 700 gool, waxaana suurtogal ah inuu sidaas sameeyo maadaama uu horey ugu dhaliyay 4 gool in ka badan 1 kulan, wuxuuna sameeyay 7 kulan.
Comments
Post a Comment